VIGAN CITY – Tallo a bangkay ti nasarakan iti tallo nga ili iti Ilocos Sur nga immunan a naireport a mapukpukaw gapu ti Bagyo Maring.
Immuna a nasarakan nga agruprupsa ti bangkay ni Pablito Fermato Cadano, agtawen ti uppat a pulo ket walo, addaan live-in partner nga agnaed idiay Brgy. Paratong, Narvacan ta binigbig ti pagayamna a ni Romie Reintegrado, agtawen ti tallopulo ket pito nga agindeg ti Brgy. Pantoc, Narvacan, Ilocos Sur.
Nakita ni Reintegrado ti maysa a bangkay ti lalaki a naangoten ngem nabigbigna nga isu ti gayyemna a mapukpukaw.
Simmuruno a nasarakan ti bangkay ti ubing nga agtawen ti siam a taga-Poblacion Suyo, Ilocos Sur babaen ti retrieval operation dagiti pannakabagi ti linteg.
Nasarakan ni Gwen Misha Mina iti Boundary iti Alilem, Tagudin ken Suyo a mapukpukaw manipod idi October 11, 2021 ket binigbig isuna ti amana a ni Melvin Mina.
Kabayatanna, maudi a nasarakan ti bangkay ni Micheal Asuncion Madrid, agtawen ti uppat a pulo ket maysa, naasawaan, mannalon nga agnaed idiay Brgy. Labut Norte, Santa.
Segun ken ni Richmund Ballon Bayubay, agtawen ti tallopulo ket dua, mannalon nga agnaed idiay Mabilbila Sur, Santa, bayat ti ti panagdalusna iti talonda idiay Brgy. Bucalag, Santa ket nakitana ti bangkay ti biktima a naka-blue t-shirt nga agruprupsan.
Insigida nga impakaammona iti Santa Municipal Police Station iti nakitana ket nagturong iti nasao a lugar dagiti pannakabagi ti linteg kaduada ni Christina Madrid nga asawa ti biktima a nangbigbig ti bangkay.
