Natalged dagiti 3 a drayber a karaman iti aksidente iti national highway ti Barangay Catayagan, Sta. Lucia, Ilocos Sur.
Ti Toyota Hiace Grandia ket minaneho ti lalaki nga agtawen iti limapulo ket lima, OFW, taga-Barangay Palali Norte, Sta. Lucia.
Ti met Dump truck ket minaneho ti lalaki nga agtawen iti duapulo ket siam, taga-Barangay Cabaroan, San Emilio.
Kabayatanna, ti Kia Picanto ket minaneho ti lalaki a taga-Barangay Angkileng, Sta. Lucia.
Maibasar iti CCTV footage, agpapa-amianan ti dump truck ken Kia Picanto idin ta bigla nga immagaw ti linya ti agpapa-abagatan a Grandia.
Pinadas a lisyan ti trak ti Grandia, ngem ti Grandia ket nadungparna latta ti likudan a paset ti trak.
Gapu iti impact ti aksidente, nadungpar ti Grandia ti Picanto nga adda iti likudan ti trak.
Nakaro ti pannakadadael dagiti lugan a Grandia ken Picanto, idinto nga adda met bassit dadael ti trak.
