Tallo a drayber ken maysa a backrider ti motorsiklo ti nadunor iti napasamak nga aksidente iti provincial road ti Barangay Tamorong, Sta. Catalina, Ilocos Sur a nakairamanan dagiti uppat a lugan.
Ti NMAX motorcycle ket minaneho ti agtawen iti sangapulo ket siam, taga-Barangay Don Dimas Querubin, Caoayan.
Ti met NMAX 150 motorcycle ket minaneho met laeng ti agtawen iti sangapulo ket siam. Agnaed iti Barangay Don Dimas Querubin.
Kabayatanna, ti Honda Click 125 motorcycle ket minaneho ti agtawen iti sangapulo ket walo, taga-Barangay Cabittaogan, Sta. Catalina, backrider-na ti agtawen iti sangapulo ket walo, taga-Capangpangan, Vigan City.
Nairaman pay ti maysa a kotse a nakaparking iti igid ti kalsada.
Iti pannaki-uman ti Bombo Radyo Vigan ken ni Police Captain Marlon Martinez, agpapalaud a direksion ti Honda Click ket nagsikko iti kannigid idin ta dagiti dua a napaspas nga NMAX ket nadungparda ti igid a pasetna isu a naguyasda iti kalsada ket nadungparda ti likudan a paset ti kotse.
Nadunor dagiti drayber dagiti tallo a motorsiklo agraman ti backrider isu a naipaagasda iti ospital para iti naan-anay a pannakatamingda.
Awan pay laeng ti nagpatangan dagiti Kamaran ta dagiti dua a drayber ti motorsiklo ket agpapaimbagda pay laeng iti ospital.
