VIGAN CITY – Duapulo ket lima a kilo ti bagas ti maawat ti tunggal taga-Vigan a fully vaccinated kontra Covid19 tapno ad-adu pay ti maallukoy nga agpabakuna.
Inlawlawag ni Mayor Juan Carlo Medina a masapul ket ditoy siudad met laeng a nabakunaan ken numan saan a taga-Vigan ta ditoy a nagpabakuna ket saan a mabalin a makaawat iti bagas ta para laeng kadagiti taga-Vigan ti nasao a benepisyo.
Maberipika a nalaing ti tunggal residente sakbay a maikkan tapno masigurado a residenteda iti siudad, fully vaccinated ken ditoy a nabakunaan.
Maited iti kada barangay ti bagas ta isudanton ti makaammo a mangiwaras ta narigrigat ti proseso no maibalay-balay.
Target ti city government a malpas ti programa agingga iti early December ta iti agdama ket agtultuloy met ti panagiwarasda.
