VIGAN CITY – Nasarakan a tumtumpaw ti nailanggusti a duapulo ket uppat a pakete ti shabu iti kabaybayan idiay Barangay Solotsolot, San Juan, Ilocos Sur.
Iti pannaki-uman ti Bombo Radyo Vigan ken ni PMaj. Benjamin Raquedan manipod iti San Juan Municipal Police Station, mapapati nga agdagsen iti nasurok kumurang maysa a kilo iti tunggal pakete ti shabu nga adda Chinese markings-na.
Segun kenkuana, uppat a mangnagalap ti nakakita iti sako a tumtumpaw iti kabaybayan iti kaadayo a 16-nautical miles manipod kadagaan.
Impagarup dagiti mangngalap a basura iti linaon ti sako isu nga imbangkagda ngem idi linukatanda ket nakitada dagiti shabu isu nga impakaammoda nga insigida dagiti otoridad.
Iti agdama ket saan pay laeng a maibaga dagiti otoridad nu mano ti gatad dagiti nasarakan a shabu ngem naipan iti Crime Laboratory tapno maikilo ken maamoan nu mano ti gatadna.
VIDEO – PMAJ. BENJAMIN RAQUEDAN
