VIGAN CITY – Balligi iti pannakarambak ti maikadua pulo ket dua a tawen nga anibersaryo dagiti Indigenous Peoples’ Organization ditoy Ilocos Region a ti nangsangaili ket ti ili ti Lidlidda nga idaulwan ni Mayor Sherwin Tomas ken naisayangkat idiay Lidlidda North Central School.
Ti nasao nga aktibidad ket nakipagpasetan dagiti miyembro ti IP ditoy probinsiya, karaman dagiti naggapu idiay Ilocos Norte, La Union ken Pangasinan.
Nadakamat ni Dr. Manuel Jaramilla, regional director ti National Commission on Indigenous People (NCIP) – Region 1 ken IP representative iti ili ti Sta. Cruz a ti nasao a selebrasyon ket gundaway a mangipasimudaag iti panagkaykaysa dagiti IP ken panangbigbig kadagiti karbenganda.
Kas paset iti selebrasyon, nagtatadek dagiti nakipaset ken naga-ay-ayam da kadagiti naduma-duma nga indigenous game ken naglutoda iti etag nga isu ti maysa nga ipagpanpannakkel a putahe dagiti agnaed iti upland municipality.
