Umaboten iti 220 ti natay iti leptospirosis iti pagilian ita a tawen, idinto a 3, 440 a kaso ti nairekord manipud Enero agingga Agosto 8, segun iti Department of Health.
Segun ken ni DOH Disease Prevention and Control Medical Officer Dr. Anne Dominique Asis-Matuba a nababbaba ti agdama a bilang dagiti kaso kumpara iti 5, 318 a nairekord iti kapada a panawen idi napan a tawen.
Nainget a bambantayan ti ahensia ti posible a panagngato ti kaso kasaruno dagiti mapadpadasan a panaglayus.
Nagbalaag ti DOH iti publiko a dagus nga agbuggo ti bagi babaen ti sabon ken nadalus a danum, agaramat ti protective boots ken agasan dagiti sugat iti bagi kangrunaan kadagiti nadaras a mabasa.
Inallukoy pay ti ahensia dagiti nagannak a saan a bay-an dagiti annak da nga agdigus wenno agay-ayam iti layus.
