Kinasoan ti Department of Public Works and Highways iti Office of the Ombudsman dagiti duapulo ket dua nga opisial ken kontratista gapu iti mapapati nga maanomalya a proyekto idiay La Union ken Davao Occidental.
Kadua ni DPWH Secretary Vince Dizon ni Independent Commission for Infrastructure Chairperson Andres Reyes a nagipila kadagiti kaso a malversation ken panaglabsing iti Section 3(e) ti Republic Act No 3019 wenno ti Anti-Graft and Corrupt Practices Act.
Karaman kadagiti nainaganan iti reklamo dagiti district ken project engineer manipud iti La Union 2nd District Engineering Office ken Davao Occidental DEO, agraman dagiti mangibagi ti Silverwolves Construction Corp. ken St. Timothy Construction Corp.
Segun ken ni ICI Executive Director Brian Keith Hosaka, sabali pay daytoy iti imbestigasion nga isaysayangkat ti komite iti agdama.
