VIGAN CITY – Maisayangkat ita a bulan ti 2021 International Federation of Muay Thai Amateur a pakipagpasetan ti sangagasut a pagilian pakairamanan ti tallo nga atleta iti probinsia.
Iti pannaki-uman ti Bombo Radyo Vigan ken ni Muay Thai coach Adrian Jay Gemar, nagtultuloy latta iti panangsanayda kadagiti atleta iti baet ti covid-19 pandemic.
Segun ken ni coach Gemar, saan a maikkat ti pressure kadagiti atleta iti pannakisalida iti international competition kalpasan ti pannangabakda iti MuayThai National Virtual Championship 2021.
Iti kalkalpas a National Championship ket Gold Medalist iti Maxfit and Shadow Boxing Competition under female – 14 category ni Princess Veyonce Reyes, gold medalist iti maxfit competition under male – 75 kg. 18-40 category ni Roy Flores Jr ken bronze medalist ni Eusebio Cortan Jr iti misfit competition under male – 75 kg. 18-45 category.
Impapusuan nga inadal dagiti atleta iti aniaman a nasursuroda isu a natalek ni coach Gemar a makaalada iti medalya iti mayur-uray a resulta iti nakilabananda.
Kabayatanna, pinasingkedan dagiti atleta a saan a nadaras ti panagsanayda babaen ti virtual ta adda ti gundaway a saan a makita amin ti coach iti garawda.
Inallukoyda met dagiti padada nga agtutubo nga agbalin nga aktibo ti sports a kas iti nakipagpasetanda ta makatulongto met laeng kadakuada para iti pagsayaatanda ken ti salun-atda.
