VIGAN CITY – Pinasingkedan ni Ilocos Sur Provincial Chief Statistical Analyst Reynor Fernando a maisayangkat ti 2020 Census of Population and Housing inton September 1-29 babaen ti house to house survey ngem masurot dagiti COVID19 protocol tapno maliklikan ti virus.
Iti pannaki-uman ti Bombo Radyo Vigan ken ni Fernando, ti tunggal enumerator ket mai-deploy kadagiti barangayda wenno iti kabangibangda a lugar ken lima nga aldaw a maidalanda iti training tapno mailawlawag kadakuada no ania ti gagem ti census nga agpaot iti sangapulo ket lima a minutos iti tunggal pagtaengan.
Impasigurado ni Fernando a saan a maibutaktak iti siasino man dagiti impormasion ta no labsingen dagiti enumerator ti paglintegan gapu ta mabalinda a makasoan.
Nupay kasta, addan ti pitogasut uppat a pulo ket siam a na-hire nga enumerator idinto a sangagasut uppat a pulo ket tallo dagiti supervisor a mangkadua kadakuada.
