VIGAN CITY – Saan pay laeng a simmurot idiay Manila ni 2019 Sea Games Duathlon Bronze medalist Efraim Inigo uray no napalubosandan a mapan agsanay isu nga iti agdama ket makipaspaset laeng iti virtual training.
Iti pannaki-uman ti Bombo Radyo Vigan ken ni Inigo, nadagsen pay laeng iti riknana a panawan ti pamiliana tatta nga adda ti Covid19 pandemic nangruna no saan nga insigida a makaawid gapu iti lockdown.
Nupay kasta, agtultuloy latta ti allowance a maaw-awatna manipud iti Philippine Sports Commission ken tallo a daras nga agpapatangda babaen online tapno makasursuroda tapno maituloy ti training uray no adda pandemya.
Malaksid iti dayta, masansan iti panagbisikletana iti kabambantayan a paset ditoy probinsia tapno saan a maikawa ti bagina ken uray no naisardeng ti physical training ket naikkanda latta ti indoor stationary bike a pagsanayanda.
