VIGAN CITY – Umabot iti 93,243 a kailyan manipud kadagiti naduma-duma a paset iti pagilian ti natulungan ti agtinawen a Bombo Medico ti Bombo Radyo Philippines.
Immuna iti dayta, naggigiddan a naisayangkat ti Bombo Medico 2019 idi kalman kadagiti dua pulo ket uppat a syudad ditoy pagilian nga adda ti Bombo Radyo ken Star FM stations na a nakaitedan kadagiti libre nga agas para kadagiti adda sakit na, libre a paparot iti ngipen ken dadduma pay a serbisyo para kadagiti agkasapulan a kailyan.
Ti naisayangkat a Bombo Medico 2019 ket kasaruno iti maika-lima pulo ket tallo a tawen nga anibersaryo iti pannakabukel ti Bombo Radyo Philippines idi 1966.
Malaksid iti 33,967 a naipaayan ti serbisyo medical, umabot pay iti 9,926, 14,500 para ti optical idinto a 34,850 iti nakaawat iti sabali pay a serbisyo kas ti libre a pustiso, hearing aids, arm prosthetics, wheelchairs, crutches, reading glasses, pakairamanan ti libre a kugit, x-ray, ecg, massage, haircut, HIV testing, cataract screening, blood sugar testing, prostate screening ken dadduma pay a minor surgery kadagiti bukol, harlip ken cleft palate ken hernia.
Adda pay dagiti legal services, feeding program, naduma-duma a lectures iti benneg ti salun-at, libre a dental kits, libro, tsinelas ken dadduma pay.
Ti panagleppas ti Bombo Medico 2019, immabot iti dua pulo ket dua a milyon a pisos a gatad iti agas ken dadduma pay a health products iti naited kadagiti agksapulan iti agas, pati dagiti dental patients.
Sumurok-kumurang a 47 milyon a pisos a katukad iti libre a konsulta, panagpaparot iti ngipen ken dadduma pay a serbisyo wennu COST OF SERVICES iti naited a libre babaen kadagiti espesyalista a doktor, dentista ken dadduma pay nga allied health professionals a sipupuso ken boluntaryo a timmulong ken nangilatang iti oras da tapnu laeng makatulong kadagiti agkasapulan.
Ti simultaneous nationwide medical, optical at dental mission ket maysa kadagiti dadakkel a programa a binukel ti chairman ti Bombo Radyo Philippines a ni Dr. Rogelio M. Florete, tapnu matulungan dagiti napanglaw ken agkasapulan nga umili ken kas paset ti corporate social responsibility ti network.
Dagiti sabali pay a proyekto ti Network ket ti agtinawen met laeng a Dugong Bombo a maisaysayangkat iti kada Nobyembre, daytoy ket bloodletting activity nga aggigiddan met laeng a maisayangkat kadagiti Bombo Radyo ken Star FM stations iti intero a pagilian ken ti benneg iti panangital-o ti kultura ket ti Bombo Music Festival iti kada bulan ti Enero para kadagiti composers, lyricists ken singers ti OPM Music.
Ti Bombo Medico itatta a tawen ket balligi a naisayangkat babaen iti tulong dagiti sponsors kas ti Morifer, Filipino Indian Chamber of Commernce Incorporated ken Department of Health.
Dagiti dua pulo ket uppat a lugar a pakaisayangkatan ti Bombo Mecico 2019 ket idiay Manila, Tuguegarao, Cauayan, Laoag, Vigan, La Union, Dagupan, Baguio, Naga, Legazpi, Bacolod, Iloilo, Roxas, Kalibo, Cebu, Tacloban, Davao, General Santos, Butuan, Koronadal, Cotabato, Dipolog, Cagayan de Oro ken Zamboanga City.
