Naipasidong iti preliminary investigation ti Department of Justice ti 20 nga indibidwal, pakairamanan ti opisial ti Department of Public Works and Highways ken dagiti pribado a kontratista, mainaig iti anomalya iti dua a flood control project idiay Barangay Sinsin, Balamban, Cebu.
Pinasingkedan ni DOJ spokesperson at Prosecution Attorney Polo Martinez a naawaten ti National Prosecution Service idi Hulyo 29 ti immuna a reklamo a kriminal nga impila ti National Bureau of Investigation Cebu District Office.
Sinaronoan daytoy ti maikadua a reklamo kontra iti kapada a respondent para iti sabali a proyekto iti isu met laeng a distrito.
Sumangsango da iti reklamo a technical malversation, malversation of public funds, graft and corrupt practices, perjury, falsification of documents by public officers, falsification, ken panagaramat ti falsified documents dagiti pribado nga indibidwal kata pay ti panaglabsing iti Government Procurement Reform Act.
Innayon ni Martinez a manamnama a manayonan pay dagiti kaso bayat nga agtultuloy ti panagsukisok dagiti law enforcement agency dagiti rekord ti flood control projects iti dadduma pay nga engineering district.
