Dua pay a bagyo iti posible a makaapektar iti pagilian ita Agosto kalpasan ti panagduprak ti Bagyo Luis ken Bagyo Maymay kas pinasingkedan ti PAGASA.
Segun ken ni PAGASA Senior Weather Speacialist ken Hydrologist Rosalie Pagulayan, uppat a bagyo iti manamnama ita a bulan.
Kabayatanna, umabot iti 1,500 millimeteres ti pakabuklan a tudo ti nairekord iti Baguio monitoring station iti PAGASA idi napan a lawas, nangat-ngato ngem iti 936.2 millimeters a normal rainfall iti lugar para iti intero nga Agosto.
Pinasingkedan ti PAGASA a nangrugi iti kalalaingan agingga napigsa ti tudo idi August 5, no man pay nakarikna iti nakapsot a tudo iti lugar sakbay iti dayta.
Segun ken ni Pagulayan, saanda nga ikkaten ti posibilidad a napigsa a tudo kadagiti sumarsaruno nga aldaw gapu iti panawen ti panagtutudo ken bagyo.
