VIGAN CITY – Kaso a panaglabsing ti Republic Act 10591 wennu Comprehensive Law on Firearms and Ammunitions ken panaglabsing ti Commission on Elections (Comelec) Resolution 10429 wennu Comelec gun ban iti sangwen da Mario Ambrocio nga agtawen iti innem a pulo, naasawaan kenni Dionisio Gayyed nga agtawen iti uppat a pulo nga agpada nga agnaed idiay Lunluno, Luba, Abra gapu iti panagikot da ti caliber 45 pistol nga adda innem a bala na ken caliber 45 pistol nga adda lima a bala na idiay Kinabiti, Pilar, Abra idi parbangon idi May 4.
Segun ken ni Police Lieutenant Leo Sta. Maria Sabaot, hepe ti Pilar municipal police station, dagiti dua ket nakemmeg da babaen ti checkpoint operation iti nasao a lugar.
Babaen iti pakpakauna nga imbestigasyon da, inbaga dagiti suspek a nakadanun da iti lugar ta inbaga da a napan da nakiminntaya iti kabagyan da a ni Barangay Kagawad Feliciano Tobias a natay ta pinaltugan dagiti saan pay nabigbig a suspek idi May 2.
Kitkitaen a naimbag dagiti otoridad nu dagiti dua ket pudno a miyembro ti private armed group iti maysa a pulitiko idiay Abra ken nu adda koneksyon da iti pannakapapatay met laeng ni Tobias uray nu inbaga da a kabagyan da ti biktima.
