Dua nga opisial ti Provincial Explosive and Canine Unit ti natay ta pinaltugan ti padada a pulis iti uneg ti quarters ti Bangued Police Station idiay Abra.
Iti pannaki-uman ti Bombo Radyo Vigan ken ni Police Major Graeme Boy Bolante Javier, Acting Chief of Police ti Bangued Police Station, agsipsipilio ni PSSg. O’Neal Ryan Calica idin ta bigla a rimmuar ni PLt. Jamieson Bulatao, officer-in-charge ken team leader ti PECU-Abra ket pinaltuganna ni Calica iti namin-ano a daras.
Nagsagrap iti uppat a tama ti paltog ti barukongna ni Calica ken naipaagas iti ospital ngem naideklara a dead on arrival.
Kalpasan ti sumagmamano a gundaway, mapapati a pinaputukan ni Bulatao ni PSMS. Edwin Bandoc, ngem nakabales met ket napaltuganna ti barukong ni Bulatao, a dead on arrival met laeng idi maipaagas iti ospital.
Simmukon kadagiti pannakabagi ti linteg ni Bandoc ket sangwenna dagiti kaso kontra kenkuana.
Madukduktalan pay laeng no ania ti motibo ti pammaltog, ngem madakdakamat nga adda ti nabayagen a saan a pagkinnaawatan da Calica ken ni Bulatao.
