VIGAN CITY – Nakakustodiyan iti Police Regional Office 1 da Police Staff Sgts. Randy Ramos ken ni Marawi Torda a nainaig iti pannakatay ti menor de edad a biktima idiay Daclapan, Cabugao kabayatan a maim-imbestigaran ti kaso a naipila kadakuada.
Malaksid kadakuada, nakakustodiya pay dagiti dua a hepe a da Pol. Capt. Ramil Llarenas iti Cabugao Municipal Police Station ken ni Pol. Capt. Benjamin Raquedan iti San Juan Municipal Police Station nga agpada a na-relieve met laeng iti puesto ken sumango iti kaso nga administratibo.
Iti pannaki-uman ti Bombo Radyo Vigan ken ni PRO 1 Head Winnie De Vera, adda latta ti karbengan dagiti pulis nga umapela ngem tatta ket mayur-uray pay laeng ti resulta iti sangapulo ket lima nga aldaw nga imbestigasyon.
Impasigurado ni De Vera nga aramidenda ti amin a pamuspusan tapno madalusan met laeng iti nagan ti Philippine National Police ken maisubli met laeng ti dignidad ken talek kadakuada iti publiko.
