Dua a lalaki ti nagpaputok iti paltog idiay Sitio Balbalino, Barangay Panay Norte, Magsingal, Ilocos Sur.
Dagiti suspek ket agpada a mannalon ken agnaed iti nasao a lugar.
Nakaawat dagiti pannakabagi ti linteg iti tawag babaen iti 911 nga adda ti agpap-paputok iti paltog iti lugar isu a dagus a nagrespondeda.
Iti pannaki-uman ti Bombo Radyo Vigan ken ni PLT. Richard Pajo, mapapati nga adda mapan sangaten dagiti nakainom a suspek isu a nagpaputokda iti paltog, sa naglibasda kalpasan ti pasamak.
Awan met ti nadangran iti panagpaputok dagiti suspek iti paltog.
Nakaala dagiti pannakabagi ti linteg iti lima nga empty shell ti caliber 45 ken maysa a magazine nga adda tallo a bala ti caliber 45.
Iti agdama, maim-imbestigaran no ania ti naun-uneg a rason iti panagpaputok iti paltog dagiti suspek.
