Naisalakan dagiti dua a mangngalap nga adda iti kaadayo a 10 nautical miles manipod iti shoreline idiay Barangay Apatot, San Esteban, Ilocos Sur iti agsapa idi kalman, June 5, 2025 .
Dagiti dua a mangngalap ket da Roger Dela Rosa Callejo, agtawen iti uppat a pulo ket dua, naasawaan; ken Rolly Natividad Cabuñas, agtawen iti tallopulo ket dua, nga agpada agnaed idiat Barangay Mantanas, Sta. Cruz.
Nakaawat ti tawag ti San Esteban Municipal Police Station manipod concerned citizen a nangipakaammo iti pannakasarak dagiti dua a mangngalap a nakalugan iti motorized bangka nga addaan ti nagan nga ALBENZON babaen ken n Rogelio Cabradilla Jr., agtawen iti limapulo ket tallo, naasawaan, mangngalap nga agnaed iti nasao a lugar.
Apaman a naawatda ti pakaammo ket nagipatulodda iti kamengda a mangipaay iti police assistance kadagiti naisalakan a mangngalap.
Naammoan a nadadael ti ignition coil iti motorized banca dagiti mangngalap isu a nastranded-da.
Immunan a naireport kadagiti pannakabagi ti linteg iti Sta Cruz Municipal Police Station ti pannakapukaw dagiti mangngalap ta June 4, 2025 iti alas tres ti parbangon idi pimmanawda kadagiti pagtaenganda.
