Nadunor dagiti drayber iti napasamak nga aksidente iti national highway ti Barangay Puerta Real, Sto. Domingo, Ilocos Sur.
Ti Honda Click motorcycle ket minaneho ti lalaki nga agtawen iti pitopulo ket walo, agnaed iti Barangay Cabaroan, Sta. Catalina.
Ti met SYM Bonus 100 motorcycle ket minaneho ti maysa a lalaki nga agtawen iti duapulo ket uppat, agnaed iti Barangay Pangpangdan, Sto. Domingo.
Agpada nga agpapa-amianan dagiti motorsiklo a ti Bonus ket sarsarunwenna ti Click.
Idi madanon ti nakapasamakan ti aksidente, imbumbuntog ti drayber ti Click ti nagpataray ta agsikko iti kannigid ket kabayatan ti proseso, natukbob daytoy ti adda iti likudanna a Bonus nga ag-overtake koma kadagiti sabali a motorsiklo.
Naipaagas dagiti 2 a drayber iti ospital para iti pannakatamingda.
