Natakawan dagiti agasawa iti uneg iti pagtaenganda idiay Barangay Barangobong, Sta. Lucia idi kalman, April 1, 2026.
Dagiti biktima ket lalaki nga agtawen iti innem a pulo ket lima, consultant ken asawana nga agtawen iti innem a pulo ket tallo nga agpada nga agnaed iti nasao a lugar.
Ti met suspek ket lalaki nga agtawen iti duapulo ket innem, baro nga agnaed idiay Nangalisan Sta. Lucia.
Iti pannaki-uman ti Bombo Radyo Vigan ken ni PMSG. Loreto Rabago iti Sta. Lucia Municipal Police Station, nagturong kadakuada dagiti biktima idi kalman ket impakaammoda pannakapukaw iti cellphone ken kuartada.
Segun ken ni Rabago, iti panangreview-da iti CCTV footage iti pagtaengan ket naammoan a bayat nga awan ti biktima a lalaki ken makumikom ti biktima a babai nga agisinsina kadagiti nateng a lakoda ket isu ti panagserrek ti suspek iti pagtaenganda.
Kinuna ni Rabago a nalawag iti CCTV footage isu a nalasinda ti suspek a nagna iti likodan a paset iti pagtaengan ken isu iti nangala iti dua a cellphone – ti iPhone 14 Plus nga aggatad iti nasurok-kumurang P60,000 ken ti Xiaomi cellphone a nasurok-kumurang P15,000 iti presyona kasta pay nga innalana iti P900.
Nammoan nga am-ammo dagiti biktima ti suspek ta isu ti agab-gabor iti daga iti paraanganda isu a patienda nga idi naikkan iti gundaway ket isu iti panagtakawna kadagiti alikamenda.
