VIGAN CITY – Dua a babai iti naisalbar iti sex den idiay Sta. Maria kalpasan iti naisayangkat nga Oplan Nena iti CIDG-Ilocos Sur babaen iti panangidaulo ni PMaj. Millenium Bantas.
Ti nasao nga entrapment operation iti CIDG- Ilocos Sur, PNP Sta. Maria, 1st PMFC, Ilocos Sur PPO ken Maritime ket nakakemmegan ni Manuel Escobar, agtawen ti pitopulo ket innem, balo, awan iti trabahona nga agnaed idiay Sitio Bataan, Brgy. Suso, Sta. Maria.
Iti pannaki-uman ti Bombo Radyo Vigan ken ni PMaj. Bantas, idi koma pay laeng a maisayangkat iti operasyonda ngem gapu iti saan a nasayaat a transakyon ket naisanud ngem gapu iti pakaammo ti concerned citizen ket insayangkat dan iti operasyon babaen iti nagserbi a kliyente dagiti biktima.
Segun ken ni Bantas, nakemmeg man idi napalabas a tawen ti nasao a suspek ngem na-dismiss laeng iti kasona ket saanda a namnamaen nga intultuloyna latta iti aramidda.
Inamin pay dagiti biktima a taga-Narvacan ken Burgos nga agtawen ti sangapulo ket siam ken agtawen ti duapulo ket uppat a no kasapulanda iti kuarta ket agturongda iti pagtaengan ti suspek tapno isapulanna isuda iti kliyenteda.
Kabayatanna, ti naidiaya a bayad iti kada maysa ket aggatad iti uppat a ribo a pisos idinto a naala manipod ti suspek iti innem a piraso iti sangaribo a pisos, maysa a sangagasut a pisos ken cellphone nga itan ket naipanen iti CIDG-Ilocos Sur para iti pannakaisagana iti kaso a maipila kontra kenkuana.
