VIGAN CITY – Immaboten iti 1,069 ti aktibo a kaso ti Covid19 manipud iti 3,906 a total cases ditoy probinsia nga isun ti kangatwan a nairekord.
Pinasingkedan ni Dr. Trina Talaga, Chief of Hospital iti Ilocos Sur Provincial Hospital, 273 a barangay ti naidalan iti critical zone kas paset ti containment strategy idinto a dagiti municipal police station ket nakissayan ti capacity-na kas ti Burgos Police Station.
Ti pannakaipalubos ti home quarantine dagiti nagpositibo a pasyente nga asymptomatic ti natakuatanda a rason no apay a bigla nga immadu dagiti kaso agsipud ta isu ti ad-adda a nangitunda iti panagiinnakar.
Karaman pay dagiti lugar a pagubraan ti ayan ti transmission isu a kiniddaw ni Gov. Ryan Singson nga adda safety seal ti tunggal establisimiento tapno masigurado a natalged met la a papanan.
Nupay kasta, maad-adal iti agdama ti pannakaipakat ti escalated community quarantine status ditoy probinsia tapno malapdan ti panagadu ti kaso.
