VIGAN CITY – Sangagasut pitopulo a persons deprived of liberty manipud iti a municipal ken city jail facilities iti probinsia ti mabenepisyaran manipud iti panangited ti regalo kas paset iti outreach program ti Department of Environment and Natural Resources – Ilocos Sur.
Ti aktibidad ket babaen ti pannakibinnulig ti DENR-Ilocos Sur iti Bureau of Jail Management and Penology.
Iti pannaki-uman ti Bombo Radyo Vigan ken ni Rosemarie Jornacion, DENR-Ilocos Sur Officer, tinawen iti panagbirukda ti depressed barangay wenno lugar para iti outreach programda ket napanunotanna a nasyaat no iti daytoy a gundaway ket dagiti PDL met ti maipaayan.
Nupay kasta, napilida dagiti jail facilities iti siudad ti Candon ken Vigan ken iti ili ti Bantay ken Tagudin kas lugar a pangipaayanda iti regalo kas sungbat kadagiti wishlist dagiti PDL.
Dagiti naipaay ket grocery items, bag, timba ken dadduma pay a kayat dagiti PDL.
Kabayatanna, maragsakan met ni Jail Inspector Roger Pascua nga isuda ti napili ti DENR a pakibinnuligan para iti daytoy a gift giving activity.
Segun ken ni Pascua, yamanenna a saan laeng a maipanggep ti aglawlaw ti pakaseknan ti nasao nga ahensia no di ket uray iti panangipaayda iti pagragsakan dagiti PDL.
Nupay kasta, kiddawna met kadagiti PDL nga an-anusanda ti biag iti uneg ta addanto latta met tiempo a mawaya-wayaanda.
