Temporaryo a winayawayaan ti Qatari government dagiti sangapulo ket pito a Pilipino a naibalud idiay Qatar gapu iti iligal a panagprotestada iti aldaw ti panagkasangay ni dati a Presidente Rodrigo Duterte.
Segun ken ni Department of Migrant Workers wenno DMW Secretary Hans Leo Cacdac, immuna a nawaya-wayaan dagiti sangapulo ket dua a lalaki a Pilipino itay alas dos iti parbangon idinto a lima a babai met itay alas kuatro iti parbangon.
Awan ti kaso a naipila kadagiti Pilipino ngem agtuloy ti imbestigasyon.
Karaman a nakemmeg dagiti tallo a menor de edad nga immunan a winaya-wayaan dagiti otoridad.
Inlawlawag ti opisial a ti pannakawayawaya dagiti Pilipino ket resulta ti pammilin ni Presidente Ferdinand Marcos Jr a siguradoen ti dagus a pannaka-wayawayada ken panangted iti legal ken welfare assistance kadakuada.
