VIGAN CITY – Nadumaduma a klase iti paputok ken sangagasut innem a pulo a bogan ti nakumpiskar dagiti pannakabagi ti linteg ditoy probinsia kabayatan ti panangpasungad ken panangrambak iti baro a tawen.
Sangapulo ket tallo dagiti naudi a lugar a nakaalaanda kadagiti paputok a pakairamanan ti Vigan, Sta. Cruz, San Ildefonso, Candon, Sta. Maria, San Vicente, Sinait, San Esteban, Caoayan,Tagudin, Nagbukel, Magsingal, ken Sta. Lucia.
Segun ken ni Ilocos Sur Police Provincial Director Wilson Doromal, nasayaat met ti nagresultaan ti agtultuloy a monitoring da kadua ti Local Government Unit ta nakikaysa met dagiti bumaranggay ken ti nagannak dagiti menor de edad a naalaan iti boga.
Maragsakan ni Doromal ta nakapatangda met a nasayaat dagiti nagannak nga isuda payen mismo ti nangisuko iti boga dagiti annakda.
Menor de edad ti kaaduan a naalaan isu a pabilgenda pay ti awareness campaign-da tapno ammodanton nga ipateg ti salun-at ken kinatalgedda nangruna no adda dagiti okasyon a kas ti baro a tawen.
Imbalakad ti provincial director a tapno nataltalged met laeng ti kasasaad kalpasan iti rambak ti baro a tawen ket nasaysayaat no agusar laengen dagiti sabali imbes a dagiti paputok.
