Nasurok a 150 a “smaller scale” a Philippine Offshore Gaming Operators (POGOs) ti mammon-monitor iti baet ti umad-adanin a panagserra dagitoy a negosio inton malpas ti tawen, segun iti Presidential Anti-Organized Crime Commission (PAOCC).
Nagtaud dagitoy babassit a POGO kadagiti dadakkel a kompania nga in-raid dagiti otoridad iti baet ti panawagan ni President Ferdinand Marcos Jr. idi Hulio a maiparit dagiti POGO gapu iti report nga adda illegal activities-da.
Immunan nga imbilin ni Marcos kadagiti otoridad nga iyuswatda ti babassit ngem adu nga operasyon kontra kadagiti POGO nga agtultuloy ti operasyonda ditoy pagilian iti baet ti total ban.
Agtultuloy met ti panangmonitor ti PAOCC iti operasion dagiti babassit a POGO ken namnamaen ti pannakaserra dagiti nabati a duapulo a dadakkel a POGO inton malpas ti tawen.
