Nangipila ni Senate Minority Leader Vicente ‘Tito’ Sotto III iti gakat a ti gagemna ket obligaren dagiti employer kadagiti pribado a sektor nga ipaayan dagiti empleadoda iti 14th month pay, malaksid iti agdama a maipatpatungpal a 13th month pay.
Segun ken ni Sotto, dakkel ti maitulongna daytoy tapno lumag-an ti kinadagsen a mapaspasaran dagiti mangmangged iti inaldaw a gastusenda, agraman ti gastos iti panangpaadal kadagiti annak.
Nagbalin a linteg ti Presidential Decree No 851 idi 1976, nga amin nga employers ket maobligar a mangted iti 13th month para kadakuada a mangmangged.
Iti salinong ti gakat, maited ti 13th month pay iti July 14 tapno matulongan dagiti mangmangged iti education expenses para kadagiti annakda, idinto a ti 14th month pay ket maited iti saan a nalablabes ngem Disyembre 24 para kadagiti gastusenda iti holiday.
Sakup ti gakat dagiti amin a non-government rank-and-file employee, dagiti mangmangged iti salinong ti Kasambahay Law, ken dadduma pay a karbengan iti 13th month pay, iti kondisyon nga agtrabahoda uray maysa laeng a bulan iti uneg ti maysa a tawen.
Saan a karaman dagiti marigatan a kompania, non-profit institutuons a maluglugi, ken dagiti employer a nangted iti 14th month pay wenno katukadna.
