VIGAN CITY – Panaglabsing iti Republic Act 10654 wenno illegal fishing ti sangwen dagiti sangapulo ket uppat a nakemmeg a mangngalap idiay Brgy. Callguip, Baggoc, Pandan ken Fuerte iti ili ti Caoayan gapu iti panagaramatda ti bukatot a pagkalap.
Nabigbig dagiti suspek a da Nestor Quodala, agtawen ti innem a pulo ket tallo; Domingo Ragamat, agtawen ti limapulo ket maysa nga agpada nga agnaed iti Brgy. Fuerte; Mamerto Ragamat, agtawen ti limapulo ket siam; Jason Ragamat, agtawen ti tallopulo; Franklyn Aninag, agtawen ti tallopulo ket uppat; Hilario Rabara, agtawen ti innem a pulo ket siam; Wilson Ragamat, agtawen ti innem a pulo ket maysa nga agpapada nga agnaed iti Brgy Baggoc; ken da Cecilio Rasco, agtawen ti limapulo ket dua; Rodel Pil, agtawen t uppat a pulo ket uppat ken ni Natividad Menor, agtawen ti innem a pulo ket lima nga agpapada nga agnaed iti Brgy. Callaguip.
Segun kenni Police Captain Henry Garcia iti Caoayan Municipal Police Station, naaktuan dagiti mangngalap iti iligal nga aramidda idi nangiwayatda ti operasyon kontra kadagiti suspek kadua ti Municipal Agriculture Office ken mayur-uray pay laeng iti desisyon ti piskalya no mano met ti mailatang a pagpyansa dagiti suspek.
Pinasingkedan pay ni Garcia nga idi kallabes ket binallaaganda dagiti opisial iti barangay ngem natakuatan a datin nga ar-aramidenda ti nasao a banag ta segun ti maysa kadagiti suspek, awanen ti sabali a pagsapulanda ket ti malakoanda, isu met ti igatandangton ti kanenda.
