VIGAN CITY – Inwaragawag ni Ilocos Sur Governor Ryan Singson iti pannakaidalan ti Modified Enhanced Community Quarantine iti sangapulo ket tallo nga ili iti probinsia ita nga aldaw gapu iti umad-adu a kaso iti covid-19.
Maibasar iti kalkalpas a press conference ni Gov. Singson, ti nasao nga addang ket maibasar iti Executive Order No. 28 a mangpainget manen iti pagannurutan kontra covid-19 ta manipod ita nga aldaw April 7 agingga April 21 ket maidalan iti MECQ iti siudad ti Vigan ken Candon, ili ti Cabugao, Bantay, Sinait, Cervantes, Narvacan, Santa, Sta. Maria, San Esteban, Sta.Lucia, Suyo ken Tagudin.
Malaksid iti dayta ket naidalan pay iti ili ti Alilem iti Enhanced Community Quarantine iti dua met laeng a lawas.
Gapu iti dayta ket nainget iti maipatungpal a restriction kangrunaan kadagiti rumuar iti pagtaengan ta adda iti checkpoint a maipan kadagiti border kadagiti nasao nga ili kasta pay a maipatungpal iti curfew hour manipod alas dies iti rabii agingga alas singko iti bigat.
Innayon ti gobernador a kasapulan nga iyetnagna iti nasao a pagannurutan ta napaay iti Resolution No. 101 manipod national gapu iti panagado iti kaso iti covid-19 iti probinsia.
