VIGAN CITY – Walo ti natay idinto a lima iti mapukpukaw iti nadumaduma nga ili ken siudad iti Ilocos Sur gapu ti panagduprak ti Bagyo Maring.
Pinasingkedan ni PLt. Joel Dasargo iti Sta. Maria Municipal Police Station a lima iti kumpirmado a natay idinto a maysa iti mapukpukaw iti ili ti Sta. Maria gapu iti panagduprak iti bagyo.
Iti pannaki-uman ti Bombo Radyo Vigan ken ni Dasargo, dagiti natay ket nabigbig a da Pastor Marvin Zamora Lagmay nga agnaed idiay Brgy. Baliw Laud; Anita Andres Agpalo, agtawen ti walopulo ket pito nga agnaed idiay Brgy. Baliw Daya; Rosita DelaCruz De Guzman, agtawen ti walopulo ket walo nga agnaed idiay Brgy. Maynganay Sur iti ili ti Sta. Maria; dagiti agama a da Juanito Ramos Velasco, retired BFP personnel, agtawen ti innem a pulo, naasawan ken ni Arnel Rapanut Velasco, agtawen ti uppat a pulo ket dua, naasawaan, tricycle driver nga agpada nga agnaed idiay Brgy. Baliw Daya idinto a ti mapukpukaw ket ni Virginia Deocales Castro, agtawen ti walopulo ket maysa, balo nga agnaed idiay Brgy. Baliw Laud, Sta. Maria.
Segun ken ni Dasargo, mapapati a naatake ti puso ni Pastor Zamora bayat ti kaaddana ti chapel gapu ti butengna iti bagyo; na-trap iti uneg ti pagtaenganna ni Agpalo; naiyanud gapu ti napigsa a layus ni Guzman idinto a dagiti agama a Velasco ket naiyanud idi mapanda alaen dagiti tarakenda a baboy.
Manarimaan met ti panangsapul ti pannakabagi ti linteg ken ni Castro ta bayat ti pannaturogna iti pagtaenganna ket saanna a nadlaw a ngimmato ti layus isu nga idi impadasna iti rummuar iti pagtaenganna ket naiyanud gapu iti kinapigsa iti kuryente iti danum.
Inlawlawag ni Dasargo nga uray pay kayatda nga arayaten amin nga agpatulong kadakuada nga agindeg ket saanda a kabaelan ta adda laeng ti pagpatinggaan ti kabaelan ti luganda a pangrescue kadakuada.
Tallo pay iti mapukpukaw iti ili ti Suyo pakairamanan ti dua nga ubbing ken maysa a lakay.
Segun ken ken ni PSSG. Ar-jay de Guzman Ofiaza iti Suyo Municipal Police Station, dagiti agkabsat nga ubbing nga agpda nga agtawen ti siam ket nabigbig a da Gwen Misha ken Gab Merchanne Mina.
Pinasingkedan ti ama dagiti ubbing a bayat ti pannaturogda iti igid ti karayan ket kellaat a ngimmato ti danum ken naglayos a gappuanan ti pannakayanud da ngem naisalakan ti ama ti bagbagina.
Kasta pay a mapukpukaw ti maysa a senior citizen nga isu ni Salvador Cadaeg Padsing, agtawen ti innem a pulo ket pito, naasawaan, mannalon nga agnaed idiay Brgy. Poblacion Suyo gapu ti pannakaiyanudna iti layos.
Adda pay ti tallo a nasarakan a bangkay iti ili ti Sta. Cruz ken siudad ti Candon idinto a maysa pay ti mapukpukaw iti ili ti Tagudin.
Nabigbig ti dua a mapukpukaw iti ili ti Sta. Cruz a da Jose Altuna Javillo Jr., agtawen ti limapulo ket uppat, naasawaan, mannalon nga agnaed idiay Brgy. Candalican, Sta Cruz gapu ti pannakalmesna, ken ni FreddieDang-ao, agtawen ti tallopulo ket lima, adda live-in partner-na, caretaker ken agnaed idiay Brgy. Capariaan, Sta. Cruz ta mapapati a nalmed bayat ti panagduprak ti Bagyo Maring, idinto a ti babai a nasarakan iti igid ti kabaybayan a paset ti Brgy. Patpata 2nd Candon City ket saan pay a nabigbig dagiti pannakabagi ti linteg.
Kabayatanna, naipakaammo pay ti pannakapukaw ni Roldan Legazpi Limon, agtawen ti uppat a pulo ket walo, naasawaan, mannalon nga agnaed idiay Brgy. Ambalayat, Tagudin kalpasan iti panagballasiwna iti rangtay ta mapapati a natinnag iti Amburayan River ta narpuog ti rangtay gapu ti Bagyo Maring.
Nupay kasta ket agtultuloy ti search and retrieval operation dagiti pannakabagi ti linteg kadagiti mapukpukaw a biktima gapu ti nasao a bagyo.
