VIGAN CITY – Insayangkat dagiti kameng ti Vigan City Police Station ti operasyon kontra kadagiti agsusugal idiay Brgy. Capangpangan.
Nabigbig dagiti suspek a da Mac Aslor, Ely Joy Baroso Peralta, Renan Lofredo Revolteado, Jhoemar Ferrer Realin, Joel Antiporda Asuncion, Alvin Tabaday, Artemio Oliva Tabaday, Benedict Espejo, Christian Torijos Prando, Mae Mae Gascon ken tallo a menor de edad.
Iti pannaki-uman ti Bombo Radyo Vigan kenni PLt. Col. Franklin Ortiz, hepe ti Vigan PNP, adda iti naawatda a report inaig iti panagsusugal ti natayan iti nasao a lugar iso a nangiwayatda ti operasyon a nakakemmeganda.
Naaktoan nga agayayam ti “Dado” dagiti suspek ket naala ti kwarta a 13, 727 ken 129 a chip, innem a mono block chair, maysa a set ti dice.
Nagpalagip ni Ortiz kadagiti umili a maiparit iti panagsugal ket saanda nga agduadua a mangkemmeg kadagiti aglabsing.
