Sangapulo ket tallo iti nakemmeg gapu ti panagsusugalda iti maysa a construction site iti Tamag, Vigan City, Ilocos Sur itay ala una baente singko iti malem, May 1, 2025.
Iti pannaki-uman ti Bombo Radyo Vigan ken ni Police Executive Master Sergeant Florian Follante manipod Vigan City Police Station, nakaawatda ti report mainaig iti panagsusugal dagiti suspek isu a nagrespondeda ket panagay-ayam dagiti suspek ti cara y cruz kalpasan a nakapangaldawda.
Segun ken ni Follante, dagiti suspek ket agtawen iti duapulo agingga limapulo ket uppat nga agpapada a construction worker iti nasao a lugar.
Naammoan a nabayag a sinipsiputan dagiti otoridad ti aramid dagiti suspek isu nga idi ada nagipakaammo kadakuada ket insigida iti panagtignayda.
Naala kadakuada ti pusta nga aggatad ti P1,036 ket maisagsaganan ti kaso a sangwenda.
