VIGAN CITY– Naisublin iti makinkukua ti P10,000 a kuarta a nakita iti maysa a babai a nai-withdraw iti ATM machine idiay Vigan Public Market babaen ti tulong ti Bombo Radyo ken ti social media.
Insubli ni Lilia Recaido ti Pong-ol, Vigan City ti kwarta a nakita na a pinanawan iti akin-kukua idi napan nagiruwar iti maysa nga ATM Machine idiay Vigan Public Market ket naamuan a ti dati a mestra na idiay UNP a ni Cristina Bondoc iti akin-kukua.
Segun ken ni Recaido, naistorya kenkuana ni Bondoc a saan na a naamuan nga insigida a mapukpukaw iti sangapulo ribo a pisos a kwarta na agsipud ta idi napan da nagwithdraw iti sabali ket saan na a napansin a tallo ribo a pisos laengen iti linaon iti account na.
Kinunana a saan na a napanunut a tagikwaen laengen iti kwarta agsipud ta ti immuna a napanunut na a posible nga adda iti napateg a pakaipapanan na iti kuarta.
Napalaos met iti panagyaman ni Bondoc iti dati nga estudyante na agsipud ta ti kuarta ket igatang na ti agas iti masaksakit nga asawa na.
