VIGAN CITY- “Panangbigbig kadagiti a babbai kas paset iti productive force iti pagilian”, dayta ti panangibilang ni Gabriela Party List Representative Emmi De Jesus iti House Bill 4113 tapno mapagbalin a sangagasut nga aldaw ti maternity leave manipud iti agdama nga innem a pulo nga aldaw a naapprubaran iti maikadwa a pannakaibasa na idiay kamara.
Ti pannakiuman ti Bombo Radyo Vigan kenni De Jesus a maysa kadagiti author ti “The 100-Day Maternity Leave Bill”, inlawlawag na a kasapulan ti maysa nga ina ti naan-anay a panawen tapno taraknen ti kaipaspasngay nga anak na ken makainana a naimbag ken gagem pay ti gakat a maikkat ti diskriminasyon kadagiti babbai a mangmangged.
Inlawlawag met ti partylist representative nga ad-adalen da ti pannakaamyendar ti paternity leave ngem ipangpangruna da dagiti inna ta kasapulan da ti naan-anay a panaginana ken isuda ti mangasikaso ti anak da nangruna iti panagpasuso tapno masigurado a nasalun-at ti maladaga.
Ti agdama ket innem a pulo laeng nga aldaw ti maternity leave dagiti inna babaen ti normal delivery ken pito pulo ket walo nga aldaw para iti caesarean delivery ngem no agbalin a linteg ti gakat ket agbalin a sangagasut nga aldaw nga adda bayad na ti maternity leave ken mabalin na pay nga ipaatiddog ti tallo pulo nga aldaw ngem awanen ti bayad na.
Immuna iti dayta ket inapprubaranen ti senado ti bukod da a bersyon nga at-atiddog pay ta mapagbalin a sangagasut dwa pulo nga aldaw ken adda nayon na a tallo pulo nga aldaw para kadagiti solo working mothers.
