Sangapulo a baboy ken maysa a natay a baboy a nailugan iti white Kia ti nasalamaan idiay Barangay Alinaay, Cabugao, Ilocos Sur.
Ti lugan ket minaneho ni Victor Rabara Ragunjan, agtawen iti tallopulo, taga-Barangay Baclig, Cabugao, kaduana ti helper a ni Glenda Umuquit Ladino, agtawen iti tallopulo ket uppat, negosyante, taga-Barangay Macatcatud, Magsingal.
Nagresponde dagiti personnel ti Cabugao Police Station iti report nga adda iligal a nagipstrek iti baboy kadagiti barangay babaen iti panagdalyasatda iti municipal road ket idi nakasangpetda, sinitarda ti lugan a nangikarga kadagiti kontrabando.
Iti pannaki-uman ti Bombo Radyo Vigan ken ni Police Major Juan Jhayr Maggay, nagatang idiay Pinili, Ilocos Norte dagiti baboy ken maideliver iti ili ti Santiago, ken dagitoy ket awanan iti naan-anay a dokumento.
Linabsing dagiti violator ti Animal Quarantine Ordinance of the Province of Ilocos Sur.
Adda itan iti kustodia ti Provincial Quarantine Office dagiti naglabsing agraman dagiti kontrabando para iti pannakaidalanna iti husto a proseso.
