Sangapulo a benepisyaryo ti impaayan ti Provincial Government of Ilocos Sur iti motorized banca kagiddan ti panagkasangay ni Governor Jerry Singson.
Karaman kadagiti nakaawat dagiti mangngalap a nakaalaw idi iti sinako a shabu manipud iti nadumaduma a coastal areas iti probinsia.
Segun ken ni Manuel Valera manipud Sta. Cruz, maysa kadagiti nakaalaw idi iti shabu ken nakaawat ita iti bangka, pagyamananna daytoy a natungpal a kari ti gobierno probinsia ta dakkel a tulong kadakuada.
Kabayatanna, pagyamanan met ni Jeoffrey Tique, President iti Federated Fisherman Association iti Vigan City a ti bangka nga inrequest-da idi kallabes ken naawatda itan ta kunana a makatulong daytoy kadakuada tapno adda usarenda nga agdalus kadagiti water lilies.
Malaksid dayta, kunana pay a mabalinto a mausar kadagiti rescue operations no kas bilang.
Iti met panagmensahe ni PBGEN. Dindo Reyes, Regional Police Director ti Police Region 1, ti pannakaiwaras dagiti bangka ket ipasimudaagna ti ‘just economy’, ken mangital-o ti pagsayaatan dagiti mangngalap, mannalon ken dagiti pamiliada babaen iti pannakaipaay kadakuada iti pagsapulan.
Innayonna pay a maaddaan laeng iti kaes-eskan ti panagdur-as no awan ti uray maysa a mabati.
