Kinumpirmaran ti Immigration Protection and Border Enforcement Section wenno I-PROBES ti Bureau of Immigration a maysa agingga tallo a pasahero kada aldaw iti international airports iti pagilian iti nakitaan ti red flag wenno indikasyon a mabalin a biktima ti human trafficking.
Segun ti BI, naing-inget ti panagbantayda ita ta ngimmato ti bilang dagiti mabikbiktima ti sindikato nga adda pakainaiganna iti scam hubs iti kaasidegna a pagilian kangrunaan idiay Cambodia, Myanmar, Laos ken Malaysia.
Maysa pay a nakita a pagkapsotan dagiti biktima isu a nadarasda a mapapati ket ti kinakurang ti edukasyon, nakaru a panagkasapulan ti pinansyal, pannakailumlom iti utang, awanan iti trabaho ken dadduma pay a personal a parikot.
Kinumpirmaran iti BI a manipod 2014 agingga ita a tawen ket nairekord iti nasurok 1,500 a pasahero iti addaan ti red flag wenno posible a biktima iti human trafficking idinto a pitogasut met iti napaawid a biktima ti scam hub.
