Mapapati a kukua ti maysa a policewoman nga ikit iti agtawen sangapulo ket uppat a suspek ti maysa kadagiti paltog a naaramat iti pammaltog iti San Jose National High School idiay Tacloban City kas pinasingkedan ti Philippine National Police (PNP).
Segun ken ni PNP Public Information Chief Col. Allen Rae Co, ti 9.mm glock ket kukua ti police a nakadeploy iti Police Regional Office 8 nga iti agdama ket addan iti kustodiya ken naidalan iti imbestigasyon.
Kabayatanna, nakarehistro met ti maysa a security agency idiay Cebu City ti caliber .38 Armscor a mapapati nga inaramat ti agtawen sangapulo ket lima a suspek, ngem dukduktalen dagiti otoridad no siasino a security guard iti nakaideployanna.
Segun ken ni Co, umabot iti uppat a pulo a basyo ti bala ti narekubre iti nakapasamakan iti insidente.
Posible pay a sumango iti agtutuon a kaso ti policewoman gapu iti mapapati a saan a husto a panangtaripato iti service firearm-na.
