VIGAN CITY – Nairekord iti 1.6% a panagdur-as iti sektor ti agrikultura ditoy pagilian iti maikadua a kwarter ti tawen kas pinasingkedan ni Agriculture Secretary William Dar.
Iti pannaki-uman ti Bombo Radyo Vigan ken ni Dar, dayta ket pagilasinan a kasapulan pay nga aggag-gaget dagiti mannalon ken mangngalap tapno dakdakkel ti maitulong ti agrikultura iti ekonomia.
Gagem ti Department of Agriculture a ngumato iti agricultural rice productivity isu nga adda dagiti nadumaduma a programa nga yuswatda kas ti School on the Air Program a pakasursurwan dagiti amin a mannalon ken ti tunggal miembro payen ti pamiliada kadagiti kabaroan a wagas ti panagtalon nangruna ita a panawen ti pandemya a maysa ti nasao a sektor kadagiti naapektaran.
Maipatungpal ti nasao a gannuat babaen iti pannakikinnammayetda kadagiti local government units (LGUs) ken dagiti agricultural extension worker nga isuda ti umuna maseknan no man agpatulong dagiti mannalon ta nakasagana latta ti ahensia a mangtarabay ken mangted kadagiti aniaman a kasapulanda.
Nupay kasta, adda planon ti ahensia no madanunto manen ti dry season planting ken ingunamgunam ti opisial a rumbeng a maitultuloy latta ti Plant Plant Plant program para iti food security ti pagilian.
