VIGAN CITY – Panaglabsing iti Republic Act 9175 wenno Chainsaw Act of 2002 ti sangwen dagiti uppat a natiliwan idiay Brgy. Mapisi, Nagbukel.
Dagiti suspek ket da Jonie Soria, agtawen iti duapulo ket walo; Jerry Soria, agtawen iti tallopulo ket pito; Julius Villaruz, agtawen iti tallopulo ket tallo; ken ni Ronie Soria, agtawen iti uppat a pulo nga agpapada a taga-San Antonio, Narvacan.
Impakaammo dagiti kameng ti Community Environment and Natural Resources Office ti Nagbukel Police Station nga adda iligal a panagpukan iti kayo iti nasao a lugar ket idi nagrespondeda, naaktuan dagiti suspek nga adda iti ikotda a chainsaw ken ti tallopulo ket innem a pulgada ti napukan a kayo ti acacia a nailugan iti owner type jeep nga adda trailer-na a kukua ken minaneho ni Jonie Soria.
Adda permit a naiparang dagiti suspek nga agpukan iti kayo ti acacia ken permit nga agusar iti chainsaw da a ti expiry date-na ket August 20, 2025 a kukua ni Eduardo Villaruz ti San Antonio, Narvacan.
Basar ti Certificate of Registration na, para iti personal laeng ti rebbengna a pagusaran ti nasao a chainsaw a maibilang a panaglabsing iti RA 9175 wenno ti DENR AO 2003-24.
