Maysa nga street level individual iti nakemmeg idiay Candon City, Ilocos Sur iti naisayangkat a buy-bust operation.
Ti suspek ket agtawen iti duapulo ket pito, naasawaan, construction worker nga agnaed iti ili ti Sta. Cruz.
Iti pannaki-uman ti Bombo Radyo Vigan ken ni Plt. Jovelyn Antalan iti Candon City Police Station, makalawas a namonitor iti tignay ti suspek ket idi nakumpirmaran iti illegal nga aktibidadna ket isu iti pannakaisayangkat iti buy-bust operation a gappuanan iti pannakakemmegna.
Segun ken ni Antalan, ti area of activities ti suspek ket iti ili ti Sta. Cruz, Sta. Lucia ken siudad iti Candon.
Naala manipod ti suspek iti nasurok-kumurang maysa a gramo iti mapapati a shabu nga aggatad iti P6,800 a naipan iti uppat a piraso iti heat-sealed transparent plastic sachets ken maysa a piraso iti rolled aluminum foil a mapapati a naglaon iti shabu residue.
Naala pay ti non-drug evidence a tallo a machine-copied P1,000, maysa a coin purse, maysa a cellphone, maysa a getteng, maysa a lighter, maysa a folded piece iti papel, maysa a nangisit a Yamaha Vega Force motorcycle, P896 ken maysa a national ID.
Kinuna ni Antalan a nagpositibo iti panagaramat iti droga ti suspek ngem saan pay nakumpirmar no positibo a shabu iti naala kenkuana.
Palagip ni Antalan kadagiti umili iti siudad a no adda mapansin nga illegal nga araramiden dagiti mapmapan iti lugarda nga ireport iti kapulisan tapno saanen nga agraira pay.
