VIGAN CITY – Nadundunor ti dua a mannalon ta tinagbat isuda ti maysa a senior citizen idiay Brgy. Banucal, Lidlidda, Ilocos Sur idi rabii ti October 30, 2021.
Iti pannaki-uman ti Bombo Radyo Vigan ken ni PLt. Medward Galay nga Officer-in-charge iti Lidlidda Municipal Police Station, nabigbig dagiti biktima a da Charles Lupadit Arreola, agtawen ti tallopulo ket maysa, naasawaan nga agnaed idiay Brgy. Banucal ken ni John Alay-ay Cabangcala, agtawen ti tallopulo ket tallo, naasawaan nga agnaed idiay Brgy. Sibsibbo idinto a ti suspek ket ni Prudencio Anastacio Cabangcala, agtawen ti innem a pulo ket lima, mannalon nga agnaed met laeng idiay Banucal iti ili ti Lidlidda.
Segun ken ni Galay, adda ti naawatda a report inaig iti pannagbat ti nasao a lugar isu a nagrespondeda ket nadanonanda dagiti biktima nga addaan ti dunor iti nadumaduma a paset ti bagida.
Naamwan iti imbestigasyon nga adda iti pasken a napasamak iti pagtaengan da Arreola ket naggi-inomda ngem mapapati a naririan ti suspek a gappuanan ti panagsisinnungbatda.
Nagturong iti pagtaenganna ti suspek ket nagsubli nga addan ti bunengna a ti kaatiddogna ket sangapulo ket innem a pulgada nga isu ti intagbatna ken ni Arreola a gappuanan ti pannakatama ti rupa, takyag, bakrang ken bukotna idinto a nagsagaba ti dunor ti barukong ti maysa pay a biktima gapu ti panaganawana.
Nupay kasta saan a napakarwan dagiti biktima ta saan unay a natadem ti buneng nga inaramat ti suspek ngem naipanda iti Candon General Hospital para ti pannakataminda idinto a dumalan ti inquest proceeding ti suspek tapno sangwenna ti kaso a maipila kontra ken kenkuana.
